Tuesday, 29 October 2019

प. शंकरराव वैरागकर यांच्या स्वरातून निथळले भावभक्तीचे चांदणे


सुरविश्वास
नाशिक, दि. २६ : दीपावलीच्या उत्सवी आणि आनंदमयी वातावरणात सुरविश्वास ची मैफल रसिकांच्या जीवनात चैतन्य निर्माण करून गेली आणि स्वरातून निथळणारे चांदणे सोबत घेऊन स्वरपर्वाची आठवण जपुनही ठेवली असेल प्रत्येकाने 'विश्वास ग्रुप' तर्फे सुरविश्वास चे नववे पुष्प आज प. शंकरराव वैरागकर यांनी गुंफले.
सदर कार्यक्रम यशवंतराव चव्हाण प्रतिष्ठान,
मुंबई विभागीय केंद्र नाशिक व विश्वास को-ऑप बँक लि., नाशिक, विश्वास ज्ञान प्रबोधिनी अ‍ॅण्ड रिसर्च इन्स्टिटयुट, नाशिक, सारस्वत बँक व रेडिओ विश्वास ९०.८ कम्युनिटी रेडिओ, विश्वास गार्डन, कुसुमाग्रज प्रतिष्ठान, ग्रंथ तुमच्या दारी यांच्या संयुक्त विद्यमाने संपन्न झाला.
ओंकार वैरागकर (तबला), सागर कुलकर्णी (संवादिनी), अथर्व वैरागकर, ईश्वरी वैरागकर (स्वरसाथ), प्रसाद शेळके (पखवाज), अन्नपूर्णा सौन्दाने (टाळ ) यांनी साथसंगत केली. कार्यक्रमाचे सूत्रसंचालन डॉ. स्मिता मालपुरे यांनी केले .
अ‍ॅडमिनिस्ट्रेटीव्ह डिझास्टर मॅनेजमेंट अ‍ॅण्ड ट्रेनिंग हब, ठाकूर रेसिडेन्सी, विश्वास गार्डन शेजारी, विश्वास को-ऑप. बँकेसमोर, सावरकरनगर, येथे हा कार्यक्रम संपन्न झाला. विश्वास ग्रृप चे कुटुंबप्रमुख विश्वास ठाकूर हे या उपक्रमाचे आयोजक असून, संकल्पना विनायक रानडे यांची आहे.
मैफिलीची सुरुवात रागभैरव रागाने केली. विलंबित बडा ख्याल चे शब्द होते 'बलमवा मोरे सैय्या'. मैत्रीपूर्ण नात्याची वीण उसवतानाच आतला प्रेमाचा झरा कितीही संकटे येऊ दे त्यात तूझ माझ नाते चिरंतन आहे हाच सुर यात होता. त्यानंतर छोटा ख्याल  सादर केला. एक तालात 'हर हर महादेव' यातून परमेश्वराची आराधना करत भावभक्तीच दर्शन समोर आले.
यानंतर ठुमरी सादर केली. 'याद पिया की आये' या शब्दांतून आर्त जाणीव व्यक्त केली. या आर्तपूर्ण स्वरांनंतर किरवाणी रागातील भजन सादर केले. 'जगत मे झूटी देखी प्रीत' प्रीतीच इतककं परखड दर्शन स्वरांतून नवा विचार देऊन गेले. मैफिलीचा समारोप 'वैकुंठीचा राया' या भैरवीने झाला. त्यात रसिक चिंब भिजले नसते तर नवलच.
कार्यक्रमात विविध भागात उल्लेखनीय कार्यबद्दल मान्यवरांना सन्मानित करण्यात आले. त्यात महाराष्ट्र गोवा बार कोन्सिल अध्यक्षपदी निवड झाल्याबद्दल अॅड. अविनाश भिडे यांचा, कविताच माझी कबरसंग्रहाच्या २१ पुरस्कारांबद्दल कवी संजय चौधरी यांचा तर 'चित्रवेध' काव्य पुरस्काराबद्दल तन्वी अमित यांचा सन्मान शंकरराव वैरागकर यांचे हस्ते करण्यात आला. कलावंतांचा सन्मान रमेश देशमुख, डॉ. मनोज शिंपी, सतीश गायधनी, शिल्पा कवीश्वर, विनायक देवधर, मिलिंद धटिंगण, माधुरी कुलकर्णी यांचे हस्ते करण्यात आला.






Wednesday, 23 October 2019

‘चार्ली चॅप्लिन एक महान कलावंत’




चार्ली चॅप्लिन एक महान कलावंत
यशवंतराव चव्हाण प्रतिष्ठान, मुंबई, विभागीय केंद्र सोलापूर आयोजित चार्ली चॅप्लिन एक महान कलावंत, चार्ली चॅप्लिन यांच्या विनोदाचं तत्व शनिवार २६ ऑक्टोबर २०१९, सायंकाळी ६ वाजता, अॅम्पी थिएटर, हिराचंद नेमचंद वाचनालय, सोलापूर येथे दाखवलं जाणार आहे. त्यातुन त्यांच्या विविध छटांवर भाष्य केले जाणार आहे. तरी आपण सर्वांनी या कार्यक्रमास उपस्थित रहावे.

‘दिवाळी पहाट’



मराठी चित्रपट संगीताच्या वाटेने, मराठी इतिहास, मराठी संस्कृती, मराठी परंपरा यांचा शोध घेत आपण कुठून वाट चुकतो आहोत याचं भान मिळवून देणारा कार्यक्रम म्हणजे दिवाळी पहाट.
यशवंतराव चव्हाण प्रतिष्ठान, मुंबई, विभागीय केंद्र सोलापूर व द हेरिटेज, सोलापूर यांच्या संयुक्त विद्यमाने शुक्रवार २५ ऑक्टोबर रोजी पहाटे ५.३० वाजता प्रा. विलास पाटील यांच्या सोबतीने मराठी पाऊल पडते पुढे... कार्यक्रमाचे आयोजन द हेरिटेज लॉन ए, गांधी नगर, होटगी रोड, सोलापूर येथे करण्यात आले आहे.   

कायद्याचे अनेक विषय कौशाल्याने हाताळणे गरजेचे – अॅड. डॉ. सुधाकर आव्हाड


सोलापूर दि. १२ ऑक्टोबर : यशवंतराव चव्हाण प्रतिष्ठान, मुंबई, विभागीय केंद्र सोलापूर व सोलापूर बार असोसिएशन यांच्या संयुक्त विद्यमाने एक दिवसीय कायदेविषयक व्याख्यानमाला संपन्न झाली.
अटक, कोठडी व जामीन या विषयावर अॅड. डॉ. राजेंद्र अनभुले यांनी मार्गदर्शन केले. नाहक एखाद्यावर हा प्रसंग आला तर कायद्याच्या कोणत्या कोणत्या कलमाचा कसा उपयोग करावा याबाबत विस्तृत मार्गदर्शन केले. तर अॅड. योगेश दंडे यांनी उच्च व सर्वोच्च न्यायालयाच्या निकालांचे श्रेष्ठत्व या विषयावर बोलताना वेगवेगळ्या न्यायाधीशांनी वेगवेगळ्या खटल्यात कसे निकाल दिले आणि त्याचा आधार नंतर अनेक प्रकरणात तसा प्रभावी ठरला हे विस्तृतपणे सांगितले आणि नेमका त्याचा वापर कसा करावा याबाबत मार्गदर्शन केले. अॅड. डॉ. सुधाकर आव्हाड यांनी हिंदू वारसा कलम ६ या विषयावर बोलताना महिलेला माहेरून अनेक हक्क या कायद्यात दिले आहेत. त्यामुळे भावा बहिणीच्या नात्यात अंतर कसे निर्माण होते आणि त्यामुळे सामाजिक परिस्थिती कशी बिघडते आणि सासरकडून या कायद्यात महिलांना कोणतेच संरक्षण नाही आणि सासरचे लोक माहेरच्या लोकांना या कायद्याचा आधार घेऊन कसा त्रास देतात, यामुळे एखाद्या महिलेचे आयुष्य कसे उध्वस्त होते याबाबत वकिलांनी घ्यावयाची काळजी याबाबत सोप्या भाषेत मार्गदर्शन केले.
या व्याख्यानमालेत ३५० वकिलांनी सहभाग घेतला.  




Monday, 21 October 2019

मंजिरीच्या झटपट रांगोळ्या...

click here, to watch full video
यशवंतराव चव्हाण प्रतिष्ठान, मुंबई, महाराष्ट्र महिला व्यासपीठ यांच्यातर्फे प्रसिद्ध रांगोळी कलाकार मंजिरी प्रभुलकर यांच्या रांगोळी कार्यशाळेचे आयोजन करण्यात आले होते. यावेळी त्यांनी कोणत्याही कागदाचा वापर न करता फक्त हाताचा वापर करून अत्यंत सोप्या आणि सुंदर रांगोळींचे प्रात्यक्षिक दिले.
प्रत्येकाकडे कला असते फक्त तिचा उपयोग करता आला पाहिजे, असंही यावेळी त्या म्हणाल्या.





Sunday, 20 October 2019

विज्ञानगंगाचे त्रेचाळीसावे पुष्प 'पेट्रोरसायने'...

विज्ञानगंगाचे त्रेचाळीसावे पुष्प 'पेट्रोरसायने'...

click here, to watch full video
यशवंतराव चव्हाण प्रतिष्ठान, मुंबई व मराठी विज्ञान परिषद यांच्या संयुक्त विद्यमाने विज्ञानगंगाकार्यक्रमांतर्गत 'पेट्रोरसायने' या विषयावर व्याख्यान आयोजित करण्यात आले होते. मराठी विज्ञान परिषदेचे कार्यवाह डॉ. अनंत पांडुरंग देशपांडे यांनी पेट्रोरसायन म्हणजे नेमकं काय? कच्च्या तेलाचा शोध कसा लागला? भारतातील पेट्रोरसायन कारखाने तसेच पेट्रोरसायनांचा उपयोग आणि अपाय काय याबद्दल त्यांनी माहिती दिली. शेवटी प्रश्नोत्तर क्षेत्रात त्यांनी उपस्थितांना मार्गदर्शन केले.











Thursday, 17 October 2019

यशवंतराव चव्हाण प्रतिष्ठान, नवी मुंबई केंद्रातर्फे ‘यशवंतराव चव्हाण गौरव पुरस्कार’



यशवंतराव चव्हाण प्रतिष्ठान, नवी मुंबई केंद्रा तर्फे यशवंतराव चव्हाण गौरव पुरस्कारदेण्यात येणार असून मानपत्र व रोख रू २०,००० असे पुरस्काराचे स्वरूप असल्याची माहिती प्रतिष्ठानच्या नवी मुंबई केंद्राचे अध्यक्ष प्रमोद कर्नाड यांनी दिली आहे. मराठी साहित्य, संस्कृती तसेच कला-क्रिडा या शिवाय सामाजिक एकात्मता, विज्ञान तंत्रज्ञान, ग्रामिण विकास, आर्थिक सामाजिक विकास, कृषी औद्योगीक समाज रचना, व्यवस्थापन प्रशासन यांपैकी कोणत्याही एका क्षेत्रामध्ये भरीव कार्य अथवा योगदान करणा-या व्यक्ति किंवा संस्थेस यशवंतराव चव्हाण गौरव पुरस्कार सभारंभपुर्वक दि. २५ नोव्हेंबर २०१९ रोजी प्रदान केला जाणार आहे. इच्छुक व्यक्ती अथवा संस्थेने प्रमोद कर्नाड संपर्क ९८६७६७३३१९/ ९०८२६९८९०४ किंवा ९८१९३३९९४४ या भ्रमण ध्वनीवर संपर्क साधून दि. २५ ऑक्टोबर पूर्वी आपली प्रवेशीका प्रतिष्ठानकडे सादर करावी, असे अध्यक्ष प्रमोद कर्नाड व सचिव डॉ. अशोक पाटील यांनी कळविले आहे.

Wednesday, 16 October 2019


स्वर्गीय यशवंतराव चव्हाण साहेब यांचे विशेष सहायक म्हणून काम केलेले आणि भारताचे माजी पंतप्रधान श्री. नरसिंह राव यांचे विश्वासू सहकारी म्हणून काम पाहिलेले मा. राम खांडेकर यांच्यासोबत यशवंतराव चव्हाण प्रतिष्ठान येथे संवाद साधण्यात आला. राम खांडेकर यांनी यशवंतराव चव्हाण साहेबांसोबतच्या अनेक आठवणींना उजाळा दिला.
यावेळी यशवंतराव चव्हाण प्रतिष्ठानच्या कार्याध्यक्ष सुप्रिया सुळे, सरचिटणीस शरद काळे, कोषाध्यक्ष हेमंत टकले आदि उपस्थित होते.





शिक्षण विकास मंच आयोजित शिक्षण परिषद शालेय शिक्षण आणि वाचनसंस्कृती...


 यशवंतराव चव्हाण प्रतिष्ठानच्या शिक्षण विकास मंचामार्फत दरवर्षीप्रमाणे यंदाही शिक्षण परिषद आयोजित करण्यात येत आहे. यावर्षी ही रविवार, दि. २४ नोव्हेंबर २०१९ रोजी आयोजित होईल. या दहाव्या वार्षिक परिषदेचा विषय शालेय शिक्षण आणि वाचनसंस्कृती असेल.
ही परिषद यशवंतराव चव्हाण प्रतिष्ठान, रंगस्वर सभागृह, चौथा मजला, मंत्रालयासमोर, मुंबई येथे सकाळी १० ते सायंकाळी ५ या कालावधीत होईल.
या परिषदेत:-
वाचनसंस्कृतीचे महत्त्व
वाचनसाहित्याचे विविध प्रकार
वाचनसंस्कृतीची सद्यस्थिती
वाचनाची आवड निर्माण करण्यासाठी सुरू असलेले वाचन कट्ट्यासारखे विविध उपक्रम, चळवळी यांचा आढावा.
वाचनसंस्कृती जोपासण्यासाठी सूचना, नियोजन, अंमलबजावणी या विषयांवर प्रामुख्याने विद्यार्थी, शिक्षक व पालक यांच्या संदर्भात चर्चा होईल.
या परिषदेत चर्चा सहभागी होऊ इच्छिणाऱ्या पुस्तकप्रेमी प्रतिनिधींना पुढील लिंक उघडून नोंदणी करता येईल.
परिषदेस प्रवेश निःशुल्क असला तरी मर्यादित आसनसंख्येमुळे लवकरात लवकर नोंदणी करावी.
उपरोक्त परिषदेबाबत आपल्या सूचनांचे स्वागत आहे. या सूचना पुढील ईमेल आयडीवर पाठवता येतील.
कार्यक्रमाचे सर्वसाधारण स्वरूप पुढीलप्रमाणे असेल:
ते ९.४५ - प्रत्यक्ष नोंदणी आणि चहापान
१० ते ११.३० उदघाटन (प्रमुख उपस्थिती:

Monday, 14 October 2019

पालक मेळावा संपन्न

'निवड : शाळेची आणि माध्यमाची' या विषयावर यशवंतराव चव्हाण प्रतिष्ठान आणि ज्ञानभाषा मराठी प्रतिष्ठान यांच्या वतीने १३ ऑक्टोबर २०१९ रोजी पुण्यातील गांधीभवन येथे पालक मेळावा संपन्न झाला. सुरुवातीला यशवंतराव चव्हाण प्रतिष्ठानचे कार्यक्रम प्रमुख दत्ता बाळसराफ यांनी हा विषय ठेवण्यामागची भूमिका मांडली. सोबतच यशवंतराव चव्हाण प्रतिष्ठान शैक्षणिक व इतर अन्य क्षेत्रात जे उल्लेखनीय कार्य करीत आहे त्या बाबतचे विवेचन केले. वैशाली सरवणकर यांनी ज्ञानभाषा मराठी प्रतिष्ठानच्या कार्याची ओळख सर्वाना करून दिली.
यानंतर मेळाव्यास उपस्थित असलेल्या तीन पालकांनी प्रतिनिधीक स्वरूपात आपली मनोगते व्यक्त केली त्यातून सध्या पालक किती जागृत झाले आहेत हे दिसून आले. यानंतर मनोज खंडरे यांनी महाराष्ट्र व भारतातील इतर राज्ये यांची इंग्रजी माध्यमाचे प्रमाणात बाबत योग्य व सविस्तर माहिती दिली. यातून  दक्षिण भारतात जसे साक्षरतेचे प्रमाण जास्त आहे तसे इंग्रजीतून शिकणाऱ्यांचेही प्रमाण जास्त आहे, असे निरीक्षण मांडले. अजित तिजोरे सर यांनी जि.प. तसेच मराठी माध्यमाच्या शाळेमधून शिकलेल्या कर्तबगार तरुण तरुणींचे सादरीकरण केले.
मेंदूविज्ञान व भाषाशिक्षण या विषयावर डॉ.श्रुती पानसे यांनी अभ्यासपूर्ण माहितीच्या आधारे सहजपणे सर्वाशी संवाद साधला. खरेतर मेंदूसारखा अवघड विषय परंतु अंत्यंत सोप्या पध्दतीने समजून सांगण्याची कुशलता विलक्षण आहे ती सर्वाना आवडली.
जेवणानंतर सत्रात श्रीमती धनवंती हर्डीकर यांनी शिक्षण भाषांचे आणि भाषांमधून या विषयाबाबत सखोल विश्लेषण केले. त्यांनी सहज गतीने आणि ओघवत्या वाणीने माध्यमाबाबत फक्त मराठीच नको तर विचार करून माध्यम ठरवा हा संदेश सर्वापर्यंत पोहचविला. आपण इतक्या खोलवर जाऊन खरेच माध्यमाबाबत खरेच निर्णय घेतो का ..? असा विचारप्रवण प्रश्र त्यांनी उपस्थित केला.
मेळाव्याच्या अखेरच्या भागात महाराष्ट्राच्या विविध भागांतून आलेल्या पालकांच्या मनात जे प्रश्न होते त्यावर चर्चा झाली. या चर्चांना डॉ. वसंतराव काळपांडे, बसंती रॉय, धनवंती हर्डीकर, डॉ. श्रुती पानसे, अजित तिजोरे यांनी उत्तरे दिली.
या मेळाव्याचा समारोप  करीत असताना यशवंतराव चव्हाण प्रतिष्ठानच्या शिक्षण विकास मंचचे मुख्य संयोजक मा. वसंतराव काळपांडे यांनी दिवसभर चाललेल्या चर्चेचा आढावा घेतला. सर्व उपस्थितांचे आणि मेळाव्यासाठी ज्यांनी मदत केली त्या सर्वाचे आभार शिक्षण विकास मंचाचे समन्वयक माधव सूर्यवंशी यांनी मानले.






ज्येष्ठ नागरिक आनंद मेळावा २०१९

यशवंतराव चव्हाण प्रतिष्ठान, मुंबई तर्फे दरवर्षीप्रमाणे यंदाही यशवंतराव चव्हाण प्रतिष्ठान मध्ये ज्येष्ठ नागरिकांसाठी आनंद मेळाव्याचे आयोजन करण्यात आले होते. या मेळाव्यामध्ये चार कर्तबगार ज्येष्ठ नागरिकांचा सत्कार करण्यात आला तसेच सोबती ज्येष्ठ नागरिक संघ, विलेपार्ले या संघटनेचा सुध्दा सत्कार करण्यात आला. यावर्षी रविवार दि. ६ ऑक्टोबर २०१९ रोजी यशवंतराव चव्हाण प्रतिष्ठान येथे बांद्रा ते दहिसर या विभागामध्ये कार्यरत असलेल्या ज्येष्ठ नागरिक व ज्येष्ठ नागरिक संघटनांचा मेळावा भरविण्यात आला होता. महिला ज्येष्ठ नागरिक श्रीमती कुमुद मंगलदास पटेल (सांताक्रुज), प्रो. निर्मला अशोक बतिजा (खार), पुरूष ज्येष्ठ नागरिक श्री. विरेंद्र शांताराम चित्रे (अंधेरी), श्री. माधव अनंत पुरोहित (कांदिवली) या चार ज्येष्ठ नागरिकांचा सत्कार प्रमुख पाहूणे डॉ. आनंद नाडकर्णी व प्रतिष्ठानचे सरचिटणीस व निवड समितीचे अध्यक्ष मा. श्री. शरद काळे यांच्य हस्ते सत्कार करण्यात आला.




Friday, 11 October 2019

कायदेविषयक एकदिवशीय व्याख्यानमाला...



सोलापूर १२ : यशवंतराव चव्हाण प्रतिष्ठान, मुंबई, विभागीय केंद्र सोलापूर, सोलापूर बार असोसिएशन, सोलापूर व यांच्या संयु्क्त विद्यमाने एकदिवशीय कायदेविषयक व्याख्यानमाला शनिवार १२ ऑक्टोबर २०१९ रोजी सकाळी ८.३० ते ५ वाजेपर्यंत डॉ. निर्मलकुमार फडकुलक सभागृह सिद्धेश्वर मंदिराजवळ, सोलापूर येथे होणार आहे. उद्घाटन मृनालिनी फडणीस, (कुलगुरु पुण्यश्लोक अहिल्यादेवी होळकर सोलापूर विद्यापीठ) तसेच सोलापूर केंद्राचे अध्यक्ष युन्नुसभाई शेख, प्रमुख पाहुणे प्रदिपसिह रजपूत (जिल्हा सरकारी वकील) उपस्थित राहणार आहेत. यावेळी प्रमुख व्याख्याते अँड. डॉ. सुधाकर आव्हाड, अँड डॉ. मकरंद आडकर, अँड. डॉ. राजेंद्र अनुभुले असणार आहेत. सर्वांनी या व्याख्यानमालेला सहभाग नोंदवा असे आयोजकांतर्फे आवाहन करण्यात आले आहे.

Thursday, 10 October 2019

विज्ञानगंगाचे त्रेचाळीसावे पुष्प ‘रेल्वे पुल'...


 यशवंतराव चव्हाण प्रतिष्ठान, मुंबई व मराठी विज्ञान परिषद यांच्या संयुक्त विद्यमाने विज्ञानगंगाकार्यक्रमांतर्गत रेल्वे पुल' या विषयावर विनामूल्य व्याख्यानाचे आयोजन करण्यात आले आहे. व्याख्याते डॉ. बी. के. कुशवाह शुक्रवार दि. १८ ऑक्टोबर रोजी सायंकाळी ५ वाजता चव्हाण सेंटर, सांस्कृतिक सभागृह, चौथा मजला, जनरल जगन्नाथराव भोसले मार्ग, मंत्रालया समोर, नरिमन पॉईंट मुंबई येथे उपस्थितांना मार्गदर्शन करणार आहेत. तरी वरील कार्यक्रमास आपण उपस्थित रहावे ही विनंती.

रांगोळी कार्यशाळा


यशवंतराव चव्हाण प्रतिष्ठान, मुंबई, महाराष्ट्र महिला व्यासपीठ तर्फे प्रसिद्ध रांगोळी कलाकार मंजिरी प्रभुलकर यांच्या रांगोळी कार्यशाळेचे आयोजन करण्यात आले आहे.
दिनांक : शनिवार , १९ ऑक्टोबर २०१९
वेळ : दुपारी २ ते ५
प्रशिक्षण शुल्क : ३००/-
स्थळ : बेसमेंट हॉल, यशवंतराव चव्हाण प्रतिष्ठान, मुंबई.
अधिक माहितीसाठी
संपर्क : संजना पवार ८२९१४१६२१६
कार्यालय : २२०४५४६० विस्तारित २४४.

Sunday, 6 October 2019

‘डॉ. कुमुद बन्सल उत्कृष्ट शैक्षणिक ग्रंथ’ पुरस्कारासाठी पुस्तके पाठविण्याचे आवाहन...


 मुंबई : दि. ७ :  सर्व विद्यार्थांना गुणवत्तापूर्ण शिक्षण मिळावे या उद्देशाने यशवंतराव चव्हाण प्रतिष्ठान, मुंबईचा विभाग शिक्षण विकास मंच मागील काही वर्षांपासून कार्यरत आहे. प्रतिष्ठानच्या शिक्षण विकास मंचाने आतापर्यंत अनेक परिषदा, कार्यशाळा आणि चर्चासत्रे चव्हाण सेंटर मध्ये आयोजित केली आहेत. तसेच शासनाला धोरणात्मक बदल करण्याच्या दृष्टीने शिफारशीही केल्या आहेत.
यशवंतराव चव्हाण प्रतिष्ठानच्या शिक्षण विकास मंचतर्फे प्रतिवर्षी शैक्षणिक विषयक लिखाण केलेल्या उत्कृष्ट पुस्तकाचे लेखक आणि प्रकाशक यांना डॉ. कुमुद बन्सल उत्कृष्ट शैक्षणिक ग्रंथ पुरस्काराने सन्मानित केले जाते. यासाठी यशवंतराव चव्हाण प्रतिष्ठानच्या शिक्षण विकास मंचाकडून उत्कृष्ट शिक्षणविषयक पुस्तकं मागविण्यात आली आहेत. शिक्षणाचे सार्वत्रिकीकरण, शिक्षणाची गुणवत्ता, मूल्यमापन पध्दती, शालेय उपक्रम, समाजाचा सहभाग, शैक्षणिक प्रशासन अशा विषयांना स्पर्श करणारे हे पुस्तक असावे.
तसेच शैक्षणिक प्रश्नांवर उपाययोजना त्यात मांडलेल्या असाव्यात. हे पुस्तक दि. १ ऑक्टोबर २०१८ ते दि. ३० सप्टेंबर २०१९ या कालावधीत प्रकाशित झालेले असावे. तरी संबंधित प्रकाशकांनी/लेखकांनी सदर ग्रंथाच्या दोन प्रती यशवंतराव चव्हाण प्रतिष्ठानच्या मुख्य कार्यालयात शनिवार दि. ३१ ऑक्टोबर २०१९ पर्यंत शिक्षण विकास मंच,
यशवंतराव चव्हाण प्रतिष्ठान, मुंबई, जनरल जगन्नाथराव भोसले मार्ग, मंत्रालयासमोर, मुंबई २१ येथे पाठवाव्यात अशी विनंती डॉ. वसंत काळपांडे मुख्य संयोजक शिक्षण विकास मंच यांनी केली आहे. अधिक माहितीसाठी संपर्क : समन्वयक श्री. माधव सूर्यवंशी ९९६७५४६४९८.

सृजन कार्यशाळा ओरिगामी / पेपर क्राफ्ट


सृजन कार्यशाळा ओरिगामी / पेपर क्राफ्ट या विषयावर दिनांक ६ ऑक्टोबर २०१९ रोजी आयोजित करण्यात आली होती. 
ही कार्यशाळा प्रिती सुद्रिक आणि अभिषेक सुद्रिक या कलाकार दांपत्याने घेतली.
सदर कार्यशाळेत पारंपारिक पद्धतीने कागदापासून कंदिल कसे बनवायचे, ओरिगामी पद्धतीने कंदिलाचे तोरण व त्याचबरोबर पेपर पासून वॉल हँगिंग या गोष्टीचे प्रात्यक्षिक देऊन ते मुलांकडून करुन घेतले.






Friday, 4 October 2019

यशवंतराव चव्हाण प्रतिष्ठानतर्फे चित्रपटप्रेमींसाठी ‘पर्सेपोलीस’


  ‘चित्रपट चावडी
नाशिक दि. ४ : यशवंतराव चव्हाण प्रतिष्ठान मुंबई, विभागीय केंद्र नाशिक व विश्वास को-ऑप. बँक लि., नाशिक, विश्वास ज्ञानप्रबोधिनी अ‍ॅण्ड रिसर्च इन्स्टिट्यूट, नाशिक, सारस्वत बँक व रेडिओ विश्वास ९०.८ कम्युनिटी रेडिओ यांच्या संयुक्त विद्यमाने चित्रपट चावडीउपक्रमांतर्गत शनिवार ५ ऑक्टोबर २०१९ रोजी सायंकाळी ६.३० वाजता सुप्रसिद्ध इराणी अ‍ॅनिमेशन दिग्दर्शक मार्जेन सत्रापी हीचा पर्सेपोलीसहा चित्रपट दाखविण्यात येणार आहे.
सदर चित्रपट डिझास्टर मॅनेजमेंट अ‍ॅण्ड ट्रेनिंग हब, ठाकूर रेसिडेन्सी, विश्वास को-ऑप. बँकेसमोर, सावरकरनगर, गंगापूर रोड, नाशिक येथे दाखविण्यात येणार आहे.
चार अ‍ॅनिमेशन पटांच्या मालिकेतील हा दुसरा चित्रपट हाही वॉल्टझ् विथ बशीरप्रमाणे आत्मचरित्रात्मक आहे. १९७९ च्या इराणमधील इस्लामिक क्रांतीच्या पार्श्वभूमीवर एका छोट्या संवेदनशील, खेळकर मुलीची धीट आणि ध्येयवेडी कहाणी आहे. ही मुलगी अर्थातच मार्जेन सत्रापी स्वत:च आहे. क्रांतीपर्व इराण हा प्रागतिक होता व एका उचभ्रू घरात रहाणारी मार्जेन अचानकपणे आलेल्या इस्लामिक क्रांतीच्या झंझावाताने हादरून गेली. त्यानंतर ती शिक्षणासाठी फ्रान्समध्ये आली. युरोपमधील मुक्त वातावरण तिला फारसे रूचले नाही. तिला मातृभूमीकडे परतण्याचे वेध लागले. हा तिचा प्रवास वैचारीक आंदोलनाने व भुराजकीय बदलांनी अत्यंत संस्मरणीय होतो. २००८ साली प्रदर्शित झालेल्या या इराणी चित्रपटाचा कालावधी ९६ मिनिटांचा आहे.
हा चित्रपट बघण्यास जास्तीत जास्त संख्येने सहभागी होण्याचे आवाहन अध्यक्ष विनायक पाटील, कार्याध्यक्ष विश्वास ठाकूर, सचिव डॉ. कैलास कमोद, कोषाध्यक्ष डॉ. सुधीर संकलेचा, सदस्य सौ. कविता कर्डक, राजवर्धन कदमबांडे, रऊफ पटेल, अ‍ॅड. नितीन ठाकरे व विक्रम मोरे यांनी केले आहे.

Thursday, 3 October 2019

‘भयंकर सुंदर मराठी भाषा’

यशवंतराव चव्हाण प्रतिष्ठान, मुंबई, विभागीय केंद्र नवी मुंबई आणि कवी कुसुमाग्रज सार्वजनिक वाचनालय संस्था, सीवुड- नेरूळ यांच्या संयुक्त विद्यमाने कोजागिरी पोर्णिमेनिमित्त भयंकर सुंदर मराठी भाषा’ याविषयावर नामवंत कवी आणि वक्ते अशोक बागवे यांच्या व्याख्यानाचे आयोजन करण्यात आले आहे. शनिवार दिनांक १२ ऑक्टोबर २०१९ रोजी सायंकाळी ७.०० वाजता कवी कुसुमाग्रज सार्वजनिक वाचनालयाच्या प्रांगणामध्ये हे व्याख्यान पार पडेल.

'पृथ्वीचे वाढते तापमान आणि आपण'

'पृथ्वीचे वाढते तापमान आणि आपण' व्याख्यान संपन्न…

click here, to watch full video


यशवंतराव चव्हाण प्रतिष्ठान, मुंबई तर्फे 'पृथ्वीचे वाढते तापमान आणि आपण' या विषयावर विनामूल्य व्याख्यानाचे आयोजन करण्यात आले होते. हवामानात होत चाललेला बदल, झाडांची होणारी कत्तल, बांधकामे, एकूणच या सर्व हासाला कारणीभूत ठरणा-या मानवी कृती आटोक्यात आणता याव्यात याविषयी व्याख्याते अतुल देऊळगावकर यांनी भावी पिढीला हवामान बदलाविषयी जागृकता निर्माण व्हावी यासाठी मार्गदर्शन केले. या गोष्टीचा गंभीर विचार करायचा असेल तर याविषयीच गांभीर्य येणा-या पिढीला कळायला पाहिजे अशी भावना यावेळी त्यांनी व्यक्त केली.